২০২৫ চনৰ ৭ আগষ্টত ৰাহুল গান্ধীয়ে কৰ্ণাটকৰ বেংগালুৰু কেন্দ্ৰীয় লোকসভা সমষ্টিৰ অন্তৰ্গত মহাদেৱপুৰা বিধানসভা সমষ্টিৰ ভোটাৰ তালিকা সম্পৰ্কে তথ্য প্ৰকাশ কৰি অনিয়মৰ অভিযোগ উত্থাপন কৰিছিল। পিছত হাৰিয়ানা সন্দৰ্ভতো তেওঁ একেধৰণৰ অভিযোগ উত্থাপন কৰে।
নিৰ্বাচন আয়োগে অৱশ্যে ৰাহুল গান্ধীৰ অভিযোগৰ প্ৰমাণ বিচাৰি তেওঁক ক্ষমা খোজা অথবা শপতনামা দাখিল কৰিবলৈ কৈছিল। এই বিষয়ক লৈ কংগ্ৰেছ আৰু নিৰ্বাচন আয়োগৰ মাজত ৰাজনৈতিক মতানৈক্য অব্যাহত আছে।
‘১৩ কোটি নাম কৰ্তন’ক লৈ কংগ্ৰেছৰ অভিযোগ
কংগ্ৰেছৰ ভিতৰুৱা সূত্ৰই দাবী কৰিছে যে দেশজুৰি SIRৰ সময়ত খচৰা ভোটাৰ তালিকাৰ পৰা ১৩ কোটিৰো অধিক নাম নথকাৰ অৱস্থা সৃষ্টি হৈছে। উত্তৰ প্ৰদেশ, পশ্চিমবংগ আৰু তামিলনাডুৰ পৰিসংখ্যাও দলটোৱে উল্লেখ কৰিছে।
অৱশ্যে ‘১৩ কোটি ভোটাৰৰ নাম স্থায়ীভাৱে কৰ্তন কৰা হৈছে’ বুলি কোৱাটো বৰ্তমানৰ তথ্যৰ ভিত্তিত সঠিক নহয়।। SIRৰ বিভিন্ন পৰ্যায়ত খচৰা তালিকাৰ পৰা নাম নথকা আৰু চূড়ান্ত ভোটাৰ তালিকাৰ পৰা নাম স্থায়ীভাৱে বাদ পৰাৰ মাজত পাৰ্থক্য আছে। মহাৰাষ্ট্ৰৰ ক্ষেত্ৰতো নিৰ্বাচন আয়োগে ২.০৭ কোটিৰ সংখ্যাটো চূড়ান্ত কৰ্তনৰ সংখ্যা নহয় বুলি স্পষ্ট কৰিছে।
কংগ্ৰেছৰ অভিযান অব্যাহত ৰখাৰ ঘোষণা
উত্তৰ প্ৰদেশ কংগ্ৰেছৰ ভাৰপ্ৰাপ্ত সচিব কুনাল চৌধুৰীয়ে SIRক লৈ গভীৰ সন্দেহ প্ৰকাশ কৰি দলটোৰ ‘ভোট চুৰি’ বিৰোধী অভিযান অব্যাহত থাকিব বুলি কয়। তেওঁৰ মতে, ভোটাৰ তালিকাৰ বিসংগতিৰ তথ্য দেশজুৰি উত্থাপন কৰা হ’ব।
ইফালে, নিৰ্বাচন আয়োগে SIR প্ৰক্ৰিয়াক ভোটাৰ তালিকা শুদ্ধ আৰু অধিক নিৰ্ভৰযোগ্য কৰাৰ এক প্ৰক্ৰিয়া হিচাপে আগবঢ়াইছে। বিভিন্ন ৰাজ্যত খচৰা তালিকাৰ ওপৰত দাবী আৰু আপত্তি দাখিলৰ সুযোগো প্ৰদান কৰা হৈছে।